Horace, Carm. 1.7 (ed. Page)

Laudabunt alii claram Rhodon aut Mitylenen

aut Epheson bimarisve Corinthi

moenia vel Baccho Thebas vel Apolline Delphos

insignes aut Thessala Tempe.

sunt, [quibus unum opus est, intactae Palladis urbem 5

carmine perpetuo celebrare et

undique decerptam frondi praeponere olivam.]

plurimus in Iunonis honorem

aptum dicet equis Argos ditesque Mycenas.

me nec tam patiens Lacedaemon 10

nec tam Larissae percussit campus opimae,

quam domus Albuneae resonantis

et praeceps Anio ac Tiburni lucus et uda

mobilibus pomaria rivis.

[albus ut obscuro deterget nubila caelo * 15

saepe Notus neque parturit imbres

perpetuo,] sic tu sapiens finire memento

tristitiam vitaeque labores

molli, Plance, mero, [//seu te fulgentia signis

castra tenent //seu densa tenebit 20

Tiburis umbra tui.] [Teucer Salamina patremque

cum fugeret,] tamen uda Lyaeo

tempora populea fertur vinxisse corona,

sic tristes affatus amicos:

[quo nos cunque feret melior fortuna parente,] 25

ibimus, o socii comitesque.

nil desperandum Teucro duce et auspice Teucro;

certus enim promisit Apollo,

ambiguam tellure nova Salamina futuram.

o fortes peioraque passi 30

mecum saepe viri, nunc vino pellite curas:

cras ingens iterabimus aequor.