Horace, Carm. 3.16 (ed. Page)

Inclusam Danaën turris aënea

robustaeque fores et vigilum canum

tristes excubiae munierant satis

{nocturnis ab adulteris},

[si non Acrisium virginis abditae 5

custodem pavidum Iuppiter et Venus

risissent:] fore enim tutum iter et patens

converso {in pretium} deo.

aurum per medios ire satellites

et perrumpere amat saxa potentius 10

ictu fulmineo: concidit auguris

Argivi domus {ob lucrum}

demersa exitio; diffidit urbium

portas vir Macedo et subruit aemulos

reges muneribus; munera navium 15

saevos illaqueant duces.

crescentem sequitur cura pecuniam

maiorumque fames. iure perhorrui

late conspicuum tollere verticem,

Maecenas, equitum decus. 20

[quanto quisque sibi plura negaverit,]

{ab dis} plura feret: nil cupientium

nudus castra peto et transfuga divitum

partes linquere gestio,

contemptae dominus splendidior reï, 25

quam si quidquid arat impiger Apulus

occultare meis dicerer horreis,

magnas inter opes inops.

purae rivus aquae silvaque iugerum

paucorum et segetis certa fides meae 30

fulgentem imperio fertilis Africae

fallit sorte beatior.

quamquam nec Calabrae mella ferunt apes

nec Laestrygonia Bacchus in amphora

languescit mihi nec pinguia Gallicis 35

crescunt vellera pascuis,

importuna tamen pauperies abest,

nec, si plura velim, tu dare deneges.

contracto melius plura cupidine

vectigalia porrigam, 40

quam si Mygdoniis regnum Alyattei

campis continuem. multa petentibus

desunt multa: bene est, cui deus obtulit

parca, quod satis est, manu.

excubiae, -arum (f. pl.) : keeping watch, watch-keeping, guard-keeping

satelles, -itis (c.) : guard, attendant; (pl.) escort

diffindo, -ere, -fidi, -fissum : split, cleave

subruo, -ere, -rui, -rutum : undermine, overthrow; destroy

illaqueo, -are : entrap, ensnare

transfuga, -ae (m.) : deserter